لقمة طيبة » وصفات سهلة

مربى البلح

منى — Fri, 10 Jan 2014 14:02:46 +0000

من أأقدم الذكريات الي في راسي صورة مغبشة الي و لماما و نحنا بلبنان , كان حدى عازمنا ع الغدا و العزيمة كانت بالجبل و بالليل و كانت سفرة ممدودة كبيررررررة و كنت عبفكر انو انا نقطة و هل السفرة عاموووود طويل مرمي ع الأرض , و كان في غنية لملحم بركات مدري شو هي بس كانت اول مرة بسمعها , من كل هل السفرة ما بتذكر الا نوع مربى قالولي انو هادا مربى البلح , بوقتها ما كنت اعرف شو بيفرق البلح عن التمر . و مع اني كنت و لا زلت ما بحب الحلو , بس منظره لفتني و دقته , اي و بعدها تركت السفرة كلها و قعت جنبه و لقمشت الصحن كله تقريباً .

لهلأ ما بحب من الحلو الا التمر و البلح , و هل المربى لازم كل سنة حضره بموسم البلح , طري و معطر بالقرنفل و القرفة , محشي باللوز , أو بالقشطة , وصفة بتااخد العقل , خرج تحضريها و تقدميها لضيوفك , كتير رح يحبوها , و الطريقة سهلة كتير و بنص ساعة بيكون المربى جاهز .

بالصحة و الهنا

The post مربى البلح appeared first on لقمة طيبة.

عجة الشوكي

منى — Wed, 05 Jun 2013 10:05:28 +0000

في هل المدينة الي لابسة غلالة سوداء من الحرايق و النار و الهم الطابق على صدر الناس , لسه عم يصير أشياء حلوة , لسى ممكن تجتمع مع ناس بتحبهن و بيحبوك أو تضحك من جوى قلبك أو تقابل صديق بالصدفة أو تتعلم أشياء جديدة , لسى الناس عم تحب و تعشق و تتجوز و تتصاحب و تولد . من زمان كانت تدايقني الزحمة , هلا كل ما مشيت بالشارع و كان في زحمة عم حب أكتر , كل ما كان زحمة معناها لسى هل المدينة بينعاش فيها و فيها ناس مؤمنة فيها , مؤمنة بالارض الي ما بتتعوض و الحياة الي ما مكن تنبنى غير على هل التراب , جامعنا مع بعض شي كبير و كل واحد ماشي بالشارع عم حس انو في شي كتير كبير بيني و بينه , أكتر منه انو ابن بلدي و مدينتي , حاسسته أخي و من لحمي و دمي , في اشيا أد ما الانسان حكى عليها و بيفكر حالو انو بيعرفها , ما ممكن يدركها غير لما يمر هو بنفسه فيها , لهيك ما كنت بعرف أديه بحب حلب و أهل حلب إلا لما انجرحت حلب و طلع كل العاطل و المنيح الي بقلبها .

بجمعة ستاتية صغيرة من الجمعات الي لسى قدرانيين نعملها , منتلاقى فيها مع البقيان و الي لسى ما هج , وصل الحكي على الاكل كالعادة , و اجت سيرة عجة الشوكي , و الي كانت عم تحكي خالة خلود أزرق , رفيقة خالتي , حكت عن الوصفة الحلبية القديمة , و اديه طيبة و سهلة , قمت انا متل الحلويين لما رجعت على البيت كان عندي كم شوكية , بشرتهن و تبلتهن و جهزتهن على طريقتها , عن جد مو معقول شو طيبين و سهلين و لا تنقي البقدونس و لا تفرميه , و أول ما طلعوا من النار كانوا مقرمشين من برة , , ما بتحسي حالك عم تاكلي عجة , و الشعب عندي شي فكرها اقراص لحمة , شي فكرها عجة كماية , كتير كتير الوصفة طيبة و مستاهلة تجربيها .

تسلم دياتك خالة خلود

بالصحة و الهنا

The post عجة الشوكي appeared first on لقمة طيبة.

سلطة الجرجير بالفطر

منى — Sun, 24 May 2009 10:03:43 +0000

اكتشفت ان نحنا شعب ما يقدر السلطات و لا يحترمها , و انا اسفة لهيك بداية بس هيك الحقيقة .

يعني بالوقت الي بكون انا مجربة فيه سلطة جديدة و بكون حاببتها كتير و يمكن عم افطر و اتغدى و اتعشى منها , لما بنزلها على الموقع بيكون التفاعل عليها قليل , و انا ما عم احكي عن الردود , عم احكي عن عدد المشاهدات و عن الناس الي جربتها , بقى هادا مؤشر عن شو منحب و شو ما منحب .

شغلة تانية , كلنا نسمع عن فوائد الرياضة , بس يا ترى كم واحدة فينا بتعمل رياضة . كلنا نعرف عن فوائد السلطة و الخضرة النية , بس يا ترى كم واحدة فينا بيكون على مائدة غداها طبق سلطة كبير لحتى تطعمي عيلتها الي هي مسؤولة عنهم و عن اكلهن و عن العادات الي رح يتعلموها و تسحب معهن طول عمرهن .

كمان مرة أسفة لأن حاسة في حدة بكلامي , بس عن جد شي بيلفت النظر , بتلاقي الشباب بأول طلعتهم بالشارع وقت الغدا , كل واحد ماسك بايده همبرغر أو تنتين , مع علبة كولا و للأمانة الغذائية بتكون دايت للتخفيف من الحريرات !! و في أحسن الحالات ما بيكون في سيكارة في ايدهم .

وجبات الفطور و الغداء و العشاء مو بس تعبية بطن و شبع , الطعام محبة و الفة و عيلة حلوة بتلتم مع بعض , على حديث حلو و على خبريات بعضهم . و لازم نعلم الأولاد احترام اللمة و احترام النعمة و بنفس الوقت نعلمهم كيف ياكلوا , لان التذوق فن و الطعام فن .

أسفة إذا زعجت حدا , و رح اسكت هلأ و ارجع لوصفة اليوم المحترمة , سلطة الجرجير بالفطر . بموت عليها هل السلطة , من كتر مو بسيطة و من كتر مو طيبة , بخمس دقايق بتكون جاهزة و حامضة و يا سلام ! و لازم حدى يجربها لحتى غير رايي

بالصحة و الهنا

The post سلطة الجرجير بالفطر appeared first on لقمة طيبة.