امبارح واليوم امطار متل السيل في حلب ..الجو ولا احلى من هيك وصبحية يوم الجمعة .. في احلى من هيك صحن لهيك يوم وهيك جو ؟

من حوالي السنة أو أكتر كنت في البيت عبفتل متل ما اغلب ستات البيوت بيقضوا يومهم ، الراديو كانت على شي اذاعة من الاذاعات ، فجاة اتذكرت راديو مونت كارلو قلت يا ترى ممكن أأقدر أطالعها . والله تركت كل شي من ايدي ودورت عليها ولقيتها.

صوتها ما كان صوت اذاعة عادي, كان صوت طفولتي والراديو الاسود العتيق الي في بيت اهلي ..المذيعة كانت عبتعمل مقابلة مع صبية , وانا كنت سبحانة في بجر عميق من الحنين ..فجاة صار الكلام مألوف وشدني شوي شوي لحتى رجعت وعيت.. كان الحكي عن الطبخ وبالاخص عن مبادرة قاموا فيها مجموعة من المدونات العربيات لحفظ تراثنا الغني من الوصفات العربية الاصيلة ، وكملت الصبية : صاحبة الفكرة منى صابوني الي اسست الجروب ، هون انا وصلت على السقف من النطة الي نطيتها .. أن شو هل الصدفة الي خلتني أدور على اذاعة صار عشر سنين اذا ما كان أكتر ما سمعتها وفي اللحظة المناسبة على الظبط

بداية نكهة عربية كان في سنة 2014 بقصة، كان في جروب تصوير مهم كتير مختص بتصوير الطعام وفيه ناس من كل العالم, بتنزل واحدة وصفة الدقة الغزاوية وبتكتب تعريف عنها انها السلطة الاسرائيلية, بتحكي واحدة من الصبايا الفلسطينيات ان هي سلطة غزاوية، بتقوم ادارة الجروب بتطالعها هي ومجموعة كبيرة من العربيات الي ناقشوا الاسرائيلية .. انا وصلت ماخرة ما حضرت كل الي صار , بس فتحت الجروب فهمت كل الكركبة الي صارت .
وصراحة انا من زمان كنت حابة اعمل جروب يجمعنا نحن المدونات العربيات , بس ما كنت عبقدر نظم افكاري كيف ممكن نجتمع وننظم امورنا وهيك .. اقترحت عليهم الفكرة ، وافقوا فورا .
الاسم الاول الي اخترته كان : على مائدة مستديرة . بس بعد التصويت فضل اغلبية الاعضاء ان يكون في كلمة “عربي” اشارة لاهم ما يميز مجموعتنا ، و هيك صار. اخترنا وصفة الدقة الغزاوية طبقناها كلياتنا . وبموعد محدد من الشهر نشرنا الوصفة وغرقنا الدنيا بالصور وقصة الوصفة وتفاصيلها . وبعدها صرنا كل شهر نعمل نفس الشي

كان في حماس كتير وبالبداية كان في اسماء مهمة جدا في الجروب , ولكن منهم مااستمروا ومنهم ما قدروا الالتزام ومنهم اشتغلوا على الجروب وكانوا عبيشتغلوا على مشروعهم الخاص بكل امانة وحماسة وعطاء . بعد شوي صار قطع للنت عن حلب ونحن حرفيا انقطعنا عن العالم الخارجي ومابقى اي وسيلة تواصل .. بهل الوقت كانت الغالية نسرين رحال ماسكة الجروب متل الام الحنونة المنظمة ..وصراحة رح اعترف ان هي السبب لاستمرار الفكرة و لان في كتير ناس بيجيهم افكار حلوة و بيبدوا فيها .. الكلام على الاستمرار ..والاستمرار كان بفضل رب العالمين وفضل نسرين .

وبما اني عدت الي التدوين ( ان شالله ) فلازم اجدد نشاطي في المجموعة . ووصفة هل الشهر ( للصدفة الجميلة ) كانت وصفة شامية : وصفة التسقية ببدوة لعائشة ميداني , وانا كنت كتير مشتهية اتعلمها بالتفصيل . لان كل ما كنت أسال يقولولي حمص حب وحمص عادي وشوية لبن وشوية ليمون .. يعني اعملها على النظر .. وبالنسبة لوصفة بسيطة فهاد شي صعب وخصوصي لما ما يكون الطبق جزء من .
عيلتي و شي تربيت عليه .

بالنسبة الي كان اكتر شي جديد هو كمية اللبن وعصير الليمون و الطحينة , لو اعملها على ذوقي كنت قلت كتير كمية اللبن و الليمون وكنت كترت الطحينة , بس مع الالتزام بالوصفة وتطبيقها اكتشفت ان الكمية مناسبة تماما وان هل الحمضية هو شي طيب كتير و تقليل الطحينة خلى الوصفة مميزة عن الفتة الي بعملها بالعادة . وشغلة تانية كمان مختلفة هو استعمال الخبز من دون تحميص , حتى لما كنت عبحضر الوصفة قليت خبز في مرحلة الاعداد لاكتشف بعد ما قرات الوصفة مرة تانية ان مافي داعي للقلي , خسارة اني كنت صورت الوصفة بالخبز المقلي وما كان في مجال اعيد الصورة .. ( يرجى اعتبار الخبز ني وتغميض العيون عن اللون الذهبي الجميل للخبز في الصورة ) ..واخر شي هو ان مافي كمون في الصلصة .. طبعا فكرت ان الكمون سقط سهوا ، بس بعدها طلع ان الوصفة ما بدها كمون .

انا التزمت بالوصفة حرفيا ، ما عدا تفصيلة واحدة ، وهي اني صفتيت الحمص بمصفاية ناعمة بعد الطحن ، حتى يكون الصوص ناعم .. انت ممكن تستغني عن هل الخطوة او ممكن تستعملي حمص جاهز وبهي الطريقة بتصير الوصفة ولا اسهل من هيك

موعدنا اسبوع القادم باذن الله ، لا تحرموني من تعليقاتكم

صحة وهنا

The post تسقية بسمنة ( تسقية ببدوة ) appeared first on لقمة طيبة.

توليفة الخضرة مع بعضها , الحمص مع الشوندر مع الفيتا مع الجرجير , بتبليهن بصوص مميز مميز , بيتاكل لحاله ه كتر مو يم يممم , رح تطلع طعمتها بتاخد العقل , لاازم تجربيها هلا هلأ

بالصحة و الهنا

The post سلطة الشوندر و الحمص الرائعة appeared first on لقمة طيبة.

رجعنا للمطبخ التركي كمان وصفة مميزة و طيبة و مو صعبة و هل الوصفة قريبة للحمة بالفرن و كمان قريبة للخضرة المشكلة الي بتعملها هلا اخت ابو الشباب , مكونات كتير مشتركة بس الطعمة مختلفة و كلو مع العافية طيب بس احيانا الواح فينا بيحب التغير .

لما بقلي الخضرة استعمل طنجرة تيفال و بهل الطريقة بيكون القلي اسهل و ما بياخد زيت او سمنة كتير , يا دوب معلقتين تلاتة زيت زيتون

The post خضرة مشكلة على الطريقة التركية appeared first on لقمة طيبة.

ما بعرف اذا التشبيه بمحله , بس وصفتي اليوم بتشبه القسم التاني , وصفة متواضعة بمكوناتها و مقاديرها و شكلها النهائي , ما فيها شي ” وااو ” , بس رح يحبها الكبير و الصغير و الي زووءه صعب و الي ما بيحب البانجان و النقاق و السقاق , كلهن رح يحبوا هل الوصفة . و هي يمكن من الوصفات القليلة الي عليها اتفاق جماهيري كبير عندي بالبيت ..

بنتي الكبيرة ما بتطيق البانجان , قالتلي ماما هون البانجان طعمته متغيرة . و هي لان ما بدها تجيبها واطية على حالها و تقلي انو طعته طيبة ..

بالصحة و الهنا

The post باذنجان بالدجاج على الطريقة التركية appeared first on لقمة طيبة.

العدد مميز و حلو و فيه افكار مهمة بتغني ايا ست بيت لو كانت مبتدئة أو متمرسة و على اعتباري من اشد المعجبين بالحمص كانت أول وصفة جربتها هي بالحمص , ما بعرف لايا شيف على التحديد بس الي بعرفه انها طيبة كتير كتير و لونها بيشهي و طعمتها و لا أطيب .


الوصفة الأصلية ما فيها طحينة و انا جربتها بطحينة و من دونها و بالطريقتين الوصفة مميزة و سهلة و كمان جربت ضيف شوية لبن و طلعت يممممم . المميز بالوصفة هو اضافة الثوم المشوي مع الطماطم المجففة و هادا برأي سر الوصفة و الي خلاها مميزة و غير عن بقية الوصفات . أخر الشي المقادير و الطريقة الموجودة في وصفتي هي غير مقادير فتافيت , انا لطشت الفكرة من المجلةو عدلت بقية الوصفة , استعملت حمص حب و على هل الاساس كملت لحتى طلعت طعمتها متل ما بحب و كمان كتبتها بالتفصيل الممل لحتى اذا واحدة حبت تجربها تلاقي جواب لكل سؤال بيخطر على بالها

شكرا فتافيت

The post حمص بالطماطم المجففة appeared first on لقمة طيبة.