لقمة طيبة » بيت المونة

تحضير و حفظ الزيتون المكسر

منى — Thu, 04 Dec 2014 20:25:26 +0000

لو كان في اكلة بس بتختصر كل شي بحبه في الاكل ، فهي الزيتون .. فيو بركة ، بينحفظ بطريقة سهلة و بيبقى سنين ، بيتحضر بعشرين طريقة كل طريقة أطيب من الطريقة التانية ، صحي و كله فوائد ، أكل الدرويش و الغني .. لو كنت بعرف اكتب شعر ، كنت كتبت بالزيتون
لما كنت صغيرة بيبي كنت كل ما شوف زيتون أضحك ، قام صاروا الكبار يقرصوني من خدودي حتى ابكي و بعدها يورجوني زيتونة ، فاضحك يعني بحب الزيتون و هو غرامي بالفطرة . و دايما لما كنا نجتمع انا و خواتي بصلنفة يكون فطورنا كل يوم صحن هل الاد .. انا ما بحب بس طعمته ، بحب كل شي بتذكره معه .
بموسم الزيتون كل سنة منحضره و منكسره و منحفظه بمي و ملح لسنة التانية ، اذا كانت طريقة الحفظ مزبوطة بيبقى سنتين و تلاتة و هو محافظ على حاله من دون ما ينتزع . الزيتون الأخضر بيتكسر بحجرة او مدقة خاصة من دون ما تنكسر البذرة ، و ممكن يتكسر بماكينات خاصة ، انا بشتريه مكسر و خالص و بعدها بشتغل فيه . بالوصفة تحت رح تشوفوا طريقة تحضير و حفظ الزيتون المكسر . بعد الحفظ منتركه على القليل شهر بمية الملح و الافضل شهرين الى تلات شهور و بعدها منحليه ، يعني منغير الماء حتى تروح منه كل طعمة المرار ، هي القصة بتاخد كم يوم حسب نوعية الزيتون و بعدها منتبله تبلات مشكل و ملون و انتوا و الي بتحبوه .
بالصحة و الهنا

The post تحضير و حفظ الزيتون المكسر appeared first on لقمة طيبة.

شنكليش

منى — Sun, 20 Apr 2014 20:03:12 +0000

شنكليش أو سوركة واحدة من الوصفات الي ما تركت شغلة ما جربتها لحتى تطلع معي , مين ما شوف من الستات الكبارية أسألهن , مين ما صحلي حدى من شي ضيعة من ضيعنا الحلوة اسألوا , و حتى اجتني كتير وصفات من زوار الموقع الكرام .. كنت جرب و جرب و جرب , يطلع معي اشيا طيبة بس بتشبه كرات اللبنة , اكتر منها الشنكليش .
المهم شفت وصفة لسها في جروبها tea and cake و جربتها , كتير كانت سهلة , المقادير كلها تحت ايدي , قمت فوراً و جربتها , ريحتها كانت روعة , لونها طلع بيعقد , شغلهاا كان متعة و الأهم انها كانت خالصة بربع ساعة , شي ما بيتسدق و وصفة ما فيها جنس التعقيد ..
لتيتها بالفليفلة و الزعتر , و خليتها تنشف شي اسبوع , و بعدها اجى وقت الدوااق , مممم , فعلاً روووعة و اطيب من اطيب شنكليش خرج تشتريه من السوق . تسلم دياتك سهى .
إذا ما في عندك قريشة ففي حلينن ادامك , اما تجيبي لبن بقر و تغليه ع النار مع عصرة ليمونة لوقت يفرط , بعدها بتخليه يبرد و تصفيه و تستعمليه في الوصفة و هادا افضل حل , و في حل سريع هو انك تحضري الوصفة باستعمال الفيتا , بس طبعاً ما في داعي تضيفي ملح لان الفيتا مالحة و خالصة

بالصحة و الهنا

The post شنكليش appeared first on لقمة طيبة.

كتشاب بدقيقة واحدة

منى — Thu, 26 Dec 2013 05:41:17 +0000

واحد من أصدقائي الي ما الهن علاقة بالمطبخ لا من قريب و لا من بعيد , طلب مني وصفة الكتشاب , و لان انا بعرف شو عندي عطيتوا هل الوصفة , سهلة و سريعة و شغلتها كتير سهلة و بتشجع الي مو صحاب مع الطبخ انو يرجعوا و يفوتوا على المطبخ مرة تانية .

تقريباً الوصفة اسهل من السهولة نفسها , منخلط كل المقادير بالليل , منخلي النكهات تتتمازج طول الليل , اي و بس . في اليوم التاني منستعمل الكتشاب متل مو حابين , كتشاب طعمته طيبة , مو حلوة كتير , مو مليان مواد حافظة و اشيا ما منعرف نقراها , و كمان متوفر دوما و بسعر رخيص .

مرات معجون الطماطم بيجي مالح زيادة , لهيك الملح بالوصفة ما منضيفوا الا اذا دعت الحاجة و بعد ما ندوق , و إذا شفتي انو قوام الكتشاب سميك , فيك تزيدي نتفة مي .

أنا بحب الفلفل الأسود كتير , و مرة رحت على مطعم كان مقدم الكتشاب مع الفلفل , صرت دوما بحضره هيك , بحط طبق للعيلة , و طبق بخاط معه شوية زيت زيتون و بطحن على الوج فلفل اسود فريش , للي بيحبوا الفلفل الأسود , رح يصير هل الصوص مفضل عندهن

بالصحة و الهنا

The post كتشاب بدقيقة واحدة appeared first on لقمة طيبة.

الزيتون المكلس

منى — Sat, 14 Dec 2013 12:05:37 +0000

من كم سنة , أيام ما كنت بدي جرب حضر كل شي بالبيت , جربت كلّس الزيتون على إيدي و نجح و كان كتير طيب , بس راحت و رحنا و ما عدت عدتها للتجربة .

هل السنة كنا بجمعة و حكوا على تكليس الزيتون , قمت ارجعت اشتهيت حضره , الي شجعني اكتر انو ل كم يوم اسمع انو فلانة كلّست زيتون و علانة كمان كلّست , و خالتي و مرت خالي و خالة امي و و و , قمت نفضت غبرة الكسل عني و قلت بدي كلسه أنا هل السنة كمان ..

لما كلّسته من زمان أستعملت الكلسة , بس كل الي جربها هل السنة استخدم القطرونة , قمت قررت استعملها انا كمان , و الطريقة مو صعبة أبداً بس بتاخد شوي وقت , و بدها انو يبقى الزيتون براسنا و نحركوا كل شوي وقت يكون منقوع بالقطرونة و كمان وقت نكون عم نحليه من القطرونة , و هي شغلة كتير مهمة لتكليس الزيتون لحتى تنجح العملية و يطلع الزيتون كلو لون واحد . و كمان مهم أنو نختار وعاء يكون فتحته مو كبيرة و نغطي الوج بطبق كبير لحتى ما نخلي و لا زيتونة تتفلحص من التكليس . منحرك و منرجع الطبق فوق الزيتون لحتى نضمن انو كل الحبات مغمورات بشكل كامل ..

أخر شي رح احكي عن اختيار الزيتون المناسب للتكليس , للزيتون المكلس كل ما كانت الحبة كبيرة بيكون أحسن و رح نشوف كذا نوع معروض , منختار الزيتون الي لونه أخضر غامق . و في شغلة اتعلمتها من سهى قمند أنو نشتري الزيتون بعد بداية موسم المطر لأن بيكون الزيت فيه أكتر و طعمته أطيب و كمان بيحلى بسرعة .

كمان من سهى اتعلمت تتبيلة بتجنن للزيتون المكلس , بالعادة الزيتون المكلس مناكله مع خبز و حلاوة , و التتبيلات بس للزيتون المكسر , مع وصفة سهى تبلنا الزيتون المكلس بتتبيلة غير شكل , كان فخاامة و تغير شكل و شي بينعاد كل سنة .

بالصحة و الهنا

The post الزيتون المكلس appeared first on لقمة طيبة.

بقدونس مجفف

منى — Sat, 05 May 2012 11:03:06 +0000

هي وصفة بس ما جربتيهاأول مرة رح تصير جزء أساسي من خزانة المونة , رح تعطي طعم طيب و مميز و ما بيشبه شي تامي للوصفة , ما اله علاقة بطعمة البقدونس العادي ..

أول مرة سمعت انو في شي اسمه بقدونس مجفف كان من كم سنة لما فتت على عالم النت لاول مرة و شفت شي طارش بكل المنتديات اسمه , ملف الوجبات السرية للمطاعم السريعة , بوقتها ما حبيت فكرته , انو شو هاد يا بي !! بقدونس مجفف ..

المهم من فترة كنت عم احضر مارتا ستيورات في حلقة مميزة كانت عم تطبخ مع ست بيت ايطالية , حضروا وصفات بتجنن و منهم تشكن بارمجان و لهل الوصفة تبلت الدجاج بالبقدونس المجفف , و كمان حضرته , على اد ما كان منظر الوصفة بيشهي و على اد ما كان تحضير البقدونس المجفف سهل , قررت حضره في اليوم التاني و خلا ساعة كان صار عندي كمية كبيرة منه ..

استعملته لكتير اشيا و كل مرة عم يعطي طعمة خيلة , كأنو واحد من أسرار الوصفات المميزة الي بتتقدم بالمطاعم . و لهيك بهل الوقت من كل سنة , لما بيكون البقدونس بوقته , بحضر كمية منيح و بحطها بمرطبان صغير و بخليها في البراد لوقت اللزوم ,استعمليه للشوربة , للسلطة , للدجاج , لخلطة البقسماط , شوب يخطر ببالك , انت و زوءك

بالصحة و الهنا

The post بقدونس مجفف appeared first on لقمة طيبة.

طريقة حفظ البازلاء

منى — Thu, 28 May 2009 06:47:23 +0000

مو كل شي نتعلمه من أهالينا بيكون صح ! و هل الشي ممكن نكتشفه بكير و ممكن نكتشفه متأخريين و ممكن ما نكتشفه أبداً . و كمان هل الشي بينطبق على العادات و على الأخلاق و حتى على الوصفات .

البازلاء من الخضرة الي بمون منها كتير , و انا ما بحب أحفظ كتير اشياء بالفريزر , بس البازلاء لا غنى عنها , لان بتلزمني كتير و ممكن أستعملها لكتير وصفات .

بالأول كنت فرزها على طريقة أمي , و هي اني بغليها مع مي و ملح و شوية سكر و ملح ليمون , و كانت الطريقة ماشي حالها , بس اللون ما يبقى أخضر و حلو بيصير على أخضر مصفر .

مرة شفت بازلاء مفرزة عند بيت حماي و كان لونها بيجنن , و كأنها تازة و بعد السؤال و الاستفسار خبرتني أم زوجي أنها بتشيلها للفريزر من دون أيا شي , بس تغسلها و تعبيها باكياس و على الفريزر , جربت طريقتها و صار لون البازلاء حلو كتير بس كانت تعزبني لتستوي , تاخد ساعة او أكتر بطنجرة الضغط و تصير طعمتها مو كتير طيبة .

أخيراً اكتشفت هل الطريقة و فيها بتصير البازلاء طرية و بنفس الوقت لونها بيجنن , و هي الطريقة الي معتمدتها من كم سنة و ان شاء الله تجربيها و تعجبك .
بالصحة و الهنا

The post طريقة حفظ البازلاء appeared first on لقمة طيبة.

تحضير البقسماط

منى — Thu, 11 Sep 2008 01:06:05 +0000

تحضير البقسماط أو الكعك المطحون في المنزل من الأفكار المفيدة جداً للاستفادة من بقايا الخبز . البقسماط المحضر في المنزل برأيي من الأسرار الهامة التي تجعل مقلياتك مميزة , بالإضافة إلى أنك تعرفين كل ما وضعته في البقسماط على عكس الكعك المطحون جاهز الذي لا يعلم سوى الله ما فيه ..

يمكن استعمال أي نوع متوفر عندك من خبز عربي أو صمون أو بريوش أو توست أو خبز أسمر و غيره و يمكن المزج بين عدة أنواع بل و هذا المزج من الأشياء التي تجعل بقسماطك مميز ..

يستعمل الخبز الجاف هذه الوصفة و إذا كانت بقايا الخبز لا تزال طرية , تحمص في الفرن المحمى على درجة حرارة 180 درجة لمدة 10 – 15 دقيقة و تقلب على الطرف الأخر في منتصف الخبز حتى تشقر . توضع البقايا ذات الحجم الواحد نوعاً ما كبقايا الخبز العربي أو بقايا الصمون كل نوع على حدة , ترتب في صينية فرن على شكل طبقة واحدة ثم توضع في الفرن حتى تجف و يسهل طحنها.
يحمص التوست حتى يشقر

تترك بعدها حتى تبرد ثم تطحن في محضرة الطعام حتى تصبح ناعمة جداً أو متوسطة و تتبل حسب الرغبة بالبهار المشكل أو البهارات الايطالية أو الفليفلة الحمراء و يمكن اضافة القليل من الشوفان لزيادة القيمة الغذائية مع القليل من الكورن فليكس المجروش حتى تقرمش مقلياتك .

عند تغميس الفخذات أو الستيك أو أي شي ستقليه , يغمس في البقسماط و يرص البقسماط بلطف عليه كي يبقى ملتصقاً أثناء القلي ثم يوضع في الفريزر لمدة نصف ساعة قبل قليه .

إذا لم يتوفر لديك محضرة طعام , توضع القطع المحمصة في كيس نايلون كبير ثم يمرر عليها شوبك أو قنينة بلورية كبيرة حتى تنعم

The post تحضير البقسماط appeared first on لقمة طيبة.

مخلل القتة

منى — Tue, 19 Aug 2008 10:42:58 +0000

هي الوصفة الي بحضر فيها كل مخللاتي , مخلل الخيار , مخلل القتة , مخلل القرنبيط , مخلل الجزر , مخلل الملفوف , كلهن كلهن نفس العيار و بغير نوعية الخضرة كل مرة , دوماً بيطلع مقرمش و هش و حامض , ما في أطيب من هيك مخلل .

بالهنا و العافية

The post مخلل القتة appeared first on لقمة طيبة.

البهار الحلبي

منى — Wed, 14 Nov 2007 13:27:33 +0000

امبارحة يوم السبت , العطلة الرسمية في سورية بعد يوم الجمعة , أخدت أولادي و رحنا لسوق المدينة و هو واحد من أحلى و أأقدم الأسواق المسقوفة في العالم , بالنسبة الي وقت أكون جنب القلعة , في شعور غريب بيغمرني , شعور إني بنت هل الأرض , بنت هل التاريخ , شعور إني إنسانة مو عادية لأن رب العالمين خلاني كون بنت حلب ,. شعور بالعظمة و الجلال . بعشق حلب و خصوصي القسم القديم منها , و بس روح لهونيك لا بحس على الوقت و لا على الناس , بحس بس إني قطعة من تاريخ قديم و مستقبل عظيم إن شا الله ..

درت في السوق و اشتريت كم غرض لازمني , و بعدها وصلت لسوق العطاريين , و هو متل كل الأسواق القديمة , محلات صغيرة كتير جنب بعضها , و كلها متخصصة بالبهارات و التوابل , من هل المحل بشتري أطيب شاي أخضر , و من عند التاني بشتري شاي معطر و ريحتو و طعمتو ما في أطيب منهن , لا تقولولي شاي ليبتون و ما بعرف شو , إلي ما داق هل الشاي ما داق الشاي , و من عند هاد بهارت بطاطا , و من عند هاد كاكاو هولندي فاخر و شي بيتقدم للملوك , و من عند عمو اسماعيل ويس خلطة بهارات حلبية لا يعلى عليها , وقفت عندو و طلبت منه يطحنلي ربع كيلو بهار مشكل , و ببعدها طالعت الليستة و بديت شوف و دوق و أخد الي يعجبني , و هو عبيطحنلي البهارات , خطرلي أسئله إذا كان للبهار الحلبي عيار محدد , قالي طبعا , قلتلو بتقدر تعطيني ياه و إلا سر المصلحة ؟ قال الي طبعا بعطيكي ياه , و طالع كرتونة و أخد قلم من ورا ادنه و كتبلي العيارات , و هيك صار عندي طريقة البهار الحلبي أو الي بيسموه السبع بهارات , و كمان الدقة الحلبية , و كمان الخلطة الحلبية , و إلي هوأهم سر من أسرار مطبخنا الطيب , شكرته كتير , و هو صار يقلي عادي , ما عملت شي , هيك الانسان السوري كريم بطبعه

رجعت على البيت و جربت أحضر ربع الكمية إلي كتبلي ياها , و طلعت رووعة , ريحتها الدافية عطرت مطبخي بأطيب ريحة , ريحة حلب الحلوة

بالصحة و الهنا

The post البهار الحلبي appeared first on لقمة طيبة.

أفضل طريقة لحفظ البندورة أو الطماطم

منى — Sun, 19 Aug 2007 16:29:26 +0000

هي طريقة رائعة لحفظ البندورة , بحضرها دوما في فصل الصيف تقريباً بين شهري تموز و أب وقت بتكون البندورة مستوية و طعمتها بتجنن بحضرها و بمليها بمرطبانات و بعدها في فصل الشتا باستعملها لان البندورة بهداك الوقت حتى لو اتوفرت بتكون من دون طعم و لا نكهة .

بعد تجهيز البندورة فيك تحفظيها باكتر من طريقة , إما تسكبها في مرطبانات صغيرة من دون ما تعبيها للاخير و بعدها غطيها و حفظيها في الفريزر , و الطريقة التانية و هي الي بعملها انا دوما انك تعبي البندورة بمرطبانات صغيرة معقمة و مغليه و بهل الطريقة رح نحفظ المرطبانات برة الفريزر بايا خزانة و هي طرية مضمونة ان شاء الله بس بشرط تحضريها بنفس طريقتي تمام .

بالصحة و الهنا

The post أفضل طريقة لحفظ البندورة أو الطماطم appeared first on لقمة طيبة.